شوفو حنية الشوايقة ( حبك كان زادى )

حبك كان زادي كان جوه الحنايا دفين
كنت بضاري من الناس وخايفه عليه من العين
عليه انا كت بصوم وافطر عليه بكابد النارين
كت بحسب سنين الغربه لما تعود تجيني متين
وكت برجاك فوق النار لما وكت لقانا يحين
نونس في براءة اطفال في الحب نروا ننهل زين
وكل مايوم يزيد البينا لما بقينا قاب قوسين
اتاريني كت فيك مخدوعه وكم من زيي مخدوعين
وماقايلاك تلعب بي تعيش اللحظه بس والحين
ماقايلاك حبيب آلاف وقلبك قبله للضالين
وماقايلاك تنسى حبيب صبر راجيك سته سنين
وتشغل بالك الاشواق لامن تذبل الياسمين
وكيفن هان عليك تنساه زولا كان عليك حنين
وكت دايراك بسمه عريضه في وش الزمان الشين
وكت دايراك وكت الحاره تبقى لي دخر خزين
وكت دايراك مقنع حوبه وكتين المضاره يبين
وكت دايراك فارس احلام تشاركني ونتم الدين
وكت دايراك شريك الروح اخدمك حافية القدمين
وكت بحلم بك انت معاي مجرتق بالعديل والزين
وجمبك في شمالك قاعده نسمع في قدر ياعين
نبشر زين مع الاصحاب وتنشبل من الوزين
انا الابحرت راكبه الموج بقيت مرسايه بين موجتين
الوداع ياسراب خداع محال مابيروي عطشانين
وداعا ياحلم عابر ويسعد ويفرح النايمين
وداعا ياكلام معسول حدو ومكمنو الشفتين
وداعا ياسحابة صيف شايله مطر شويله رهين
تبشر بي خريف جايينا لامن ناس رجوهو سنين
وكل زولا بفكر فيها مامعروفه تنزل وين
والف سلام عليك ياقلبي مسالم وديمه طبعو حنين
يتاورو الشوق ويلعب بيه تنحر في حشاه السكين
تعاودو الذكرى في جواه حالتو تحنن المسكين
أخيرا ليك الف سلام قبل ماتجف دموع العين
وقبال مني ماتعدي وقبال الفراق مايحين
بخيت وسعيد عليك انشالله يبقالك عمار وبنين
وقلبي انا خلي في اناتو بعدك ياما راجي انين
وان كان ياقلب حبيت بعدو بعد قسمت يمين
انشالله ماينتم ليك مراد وماتضوق لاحلو ولازين
وعمرك ماتجيك سعاده وماتتهنا قول آمين
وتاني الحب عليك حرمان وعد الحر أمانه ودين
كان جوه الحنايا دفين
كنت بضاري من الناس وخايفه عليه من العين..

الحب زمان خلاص و حب شنو كلام فاضي شنو -ده كان زمااااااان - هسع كل شي بقي هردبيس