ليل الغربه

ليل الغربه


وليدك يمه في الغربه ** عيونو الديمه بكايه
تعد للليل نجيماتو ** وتسرح فيك ياالغاليه
وكعت تفتح عيون الليل ** تقومي وتبدي تربايه
قوم ياود وهوي يابت ** بدور لي تضوو دنيايا
ريحه البن ضهيريه ** معاك السيده وهنايا
ولمه ناس كتاربالحيل**وجوطه شديده ووشايه
$$$
بحب بلدي وبريد ناسا ** وبعشق يمه للحله
ارض حمرا وناس المان** والخلوات وناس بله
حدير بالحيل سمح زجميل ** وخرت البلي بالجله
شارع النص وفرن السوق ** وناس السوق وناس فله
سفيان داك وفتحي كمان ** احمد امام وعبد الله
$$$
ولما العيد يهل يومو ** ونمشي نصلي ضحويه
شيخ احمد والنوبات ** والضيفان وليليه
ورمل النيل ولمه جيل ** نزول بنوتنا عصريه
واااااه يايمه دي الغربه** عذاب ومهانه يوميه
اريت القريش طاير** اريت لاخمسه لا ميه
وارجع لي حضن عينيك** وبيك املي عينيا


٢٣-١٠-٢٠٠٨

ياسر كفايه الله يرحم والديك
ما كفايه الفينا
شكرا كتير يا باشمهندس في اي شي

والله يجي منك يا بكاي .............. بس ناس فلة ديل منوا

ابووجن عودا حميدا يا عزيزي" ماعارف اسمك الحقيقي ياشاب"
ومشكور علي المرور

كيمو "الشمار شنو ليك??? بيقولوا المعني في بطن الشاعر"
هههههههههههههههههههههههههه
تشكر علي المرور ياراقي